ABŞ bu ölkəyə hücumu nəzərdən keçirir - İddia

Tramp administrasiyası Kubaya qarşı hərbi əməliyyat variantını əvvəlkindən daha ciddi şəkildə nəzərdən keçirir.

Xeberal.com xəbər verir ki, "Politico"ya danışan mənbələr belə iddia irəli sürüblər. Məlumata görə, ABŞ Kubaya qarşı iqtisadi və diplomatik təzyiqlərin uğursuzluğu səbəbindən hərbi variantı nəzərdən keçirir.

Adı açıqlanmayan rəsmi, “Əvvəlcə elə hesab olunurdu ki, Kubanın rəhbərliyi zəifdir. ABŞ-nin İran və Venesuelaya qarşı tətbiq etdiyi sərt sanksiyaların uğurlu olması və bu ölkələrə qalib gəlməsi kubalıları qorxutmalı və onları geri addım ataraq ABŞ ilə razılaşmağa məcbur etməli idi. Lakin hadisələr gözlənildiyi kimi getmədi: İrandakı vəziyyət dəyişdi və Kubanın sanksiyalara qarşı düşünüldüyündən güclü olduğu bəlli oldu. Buna görə də, hərbi müdaxilə əvvəlkindən daha çox gündəmdədir”, - deyə bildirib.

İrana hücum buna görə təxirə salınıb

ABŞ Prezidenti Donald Tramp Körfəz ölkələrinin xahişi ilə İrana planlaşdırılan hücumları bir neçə gün təxirə salmaq qərarına gəldiyini açıqlayıb.

Xeberal.com xəbər verir ki, Tramp İrana hücumları bərpa etməyə tam hazır olduqlarını ifadə edib. O, bildirib ki, Səudiyyə Ərəbistanı, Birləşmiş Ərəb Əmirlikləri və Qətər liderləri onunla əlaqə saxlayaraq İranla razılığa gəlməyə çox yaxın olduqlarını və buna görə də hücumların təxirə salınmasını xahiş ediblər.

Tramp, "Ötən gün regiondan zənglər aldım, dedilər ki, “Cənab, razılığa çox yaxınıq, bir neçə gün gözləyə bilərikmi?” və mən də "yaxşı" dedim", - deyə bildirib.

İrandan ABŞ-yə yeni təklif

İranın Pakistanın vasitəçiliyi ilə ABŞ-yə 14 maddəlik yeni təklif təqdim etdiyi bildirilir.

Xeberal.com xəbər verir ki, bu barədə “Tasnim” xəbər agentliyi məlumat yayıb. Təklifdə müharibəyə son qoymaq üçün danışıqlar və ABŞ tərəfinin etimad gücləndirmə tədbirlərinə diqqət yetirildiyi bildirilir.

Qeyd edək ki, bundan əvvəl də İranın ABŞ ilə danışıqlarda vasitəçilik edən Pakistana müharibəyə son qoya biləcək razılaşma təqdim etdiyi bildirilmişdi. ABŞ Prezidenti Donald Tramp İranın təklifini nəzərdən keçirdiyini və onu qəbuledilməz hesab etdiyini ifadə etmişdi.

T​ürkiyə "qan gölü"nə döndü - 6 ölü, 8 yaralı

Türkiyədə dəhşətli cinayət hadisəsi baş verib. Qanlı olay Mersin vilayətinin Tarsus rayonunda qeydə alınıb.

Xeberal.com xəbər verir ki, Metin Ö. adlı şəxs düşmən münasibətdə olduğu Sabri və Samet Pan qardaşlarının işlətdiyi restorana silahlı hücum edib. Ard-arda açılan atəş nəticəsində Sabri Pan və restoranın müştərisi olan Ahmet Ercan Can vəfat edib.

Cinayətkar hadisə yerindən qaçarkən yolda yeni qətllər törədib. Onun ard-arda açdığı atəş nəticəsində daha 4 nəfər ölüb, 8 nəfər ağır yaralanıb.

Polis cinayətkarın yaxalanması üçün bölgədə genişmiqyaslı əməliyyat keçirir.

İki təyyarə havada toqquşdu - FOTO

ABŞ-ın İdaho ştatında təyyarələrin uçuşu faciəyə çevrilib.

Xeberal.com xəbər verir ki, iki təyyarə havada toqquşub, toqquşmanın dərhal ardından göy üzünü qara tüstü bürüyüb.

Hadisə ABŞ-ın İdaho ştatında təşkil edilən bir aviasiya tədbiri zamanı baş verib. "Mountain Home" Hava Qüvvələri Bazasında keçirilən "Gunfighter Skies" adlı hava şousu zamanı nümayiş göstərən iki təyyarə havada toqquşub.

Yerli mənbələr və hərbi rəsmilər tərəfindən verilən açıqlamalara görə, qəzaya uğrayan təyyarələrdəki heyət katapult oturacaqlarını aktivləşdirərək vaxtında müdaxilə edə biliblər. Hadisə anında göy üzündə açılan 4 paraşüt kameralara əks olunub.

Çindən İranla bağlı çağırış

Çin Xalq Respublikası Xarici İşlər Nazirliyi İran ətrafında yaranmış böhranla bağlı rəsmi bəyanat yayıb.

Xeberal.com xəbər verir ki, Pekin bəyanatında regiondakı münaqişənin diplomatik yolla nizama salınmasının vacibliyini diqqətə çatdırıb.

Nazirliyin açıqlamasında qeyd olunub ki, mövcud gərginliyin daha da uzanması heç bir tərəfə fayda vermir və heç kimin maraqlarına xidmət etmir. Rəsmi Pekin vurğulayıb ki, sabitliyin dərhal bərpa olunması həm ABŞ və İranın, həm region ölkələrinin, həm də bütövlükdə qlobal birliyin xeyrinədir.

Çin tərəfi kəskin mövqe nümayiş etdirərək əlavə edib ki, əslində bu münaqişənin ortaya çıxması başlanğıcdan bəri tamamilə yanlış bir proses olub.

Bəzi ölkələr ABŞ-ni müharibəyə sürükləmək istəyir - Abbas Əraqçi

Bəzi ölkələr danışıqlarda təxribat etmək və ABŞ-ni müharibəyə sürükləmək istəyir.

Xeberal.com xəbər verir ki, İranın xarici işlər naziri Abbas Əraqçi Hindistanın Yeni Dehli şəhərində keçirilən BRICS Xarici İşlər Nazirləri görüşü çərçivəsində təşkil olunan mətbuat konfransında belə açıqlama verib. O bildirib ki, İran diplomatiyaya daha bir şans verməyə çalışır, lakin Vaşinqtonun danışıqlarla bağlı mövqeyi ciddi oldarsa, Tehran masaya qayıda bilər.

Ölkəsinin heç vaxt nüvə silahı əldə etmək niyyətində olmadığını təkrarlayan Əraqçinin sözlərinə görə, İran dəfələrlə atom bombası istəmədiyini bəyan edib. Diplomat, İranın nüvə fəaliyyətinin dinc məqsədli olduğunu irəli sürüb.

Tramp Si Cinpinin ona dediyi fikirləri açıqladı

ABŞ Prezidenti Donald Tramp Çin səfəri ilə bağlı açıqlama verib.

Xeberal.com xəbər verir ki, Tramp, Çin sədri Si Cinpinin onu nailiyyətlərinə görə təbrik etdiyini ifadə edib. O, ABŞ və Çin münasibətlərinin əvvəlkindən daha güclü və daha yaxşı olacağına ümid etdiyini qeyd edib. Tramp sosial media paylaşımında ABŞ-nin sabiq Prezidenti Co Baydeni hədəfə alıb. Tramp iddia edib ki, Si Cinpin ABŞ-ni tənəzzülə uğrayan ölkə kimi təsvir edərkən Co Bayden dövrünə istinad edir. Si Cinpinin Bayden dövrü haqqında haqlı olduğunu iddia edən Tramp, Amerika iqtisadiyyatının, siyasətinin və sosial strukturunun həmin dövrdə zəiflədiyini irəli sürüb.

Tramp ABŞ-nin öz hakimiyyəti dövründə isə bütün sahələrdə irəliləyişlər əldə etdiyini iddia edib.

Nəvəsi İbrahim Tatlısesi məhkəməyə verir

Türkiyəli məşhur sənətçi İbrahim Tatlıses yenidən ailə qalmaqalı ilə gündəmə gəlib. Bu dəfə sənətçinin nəvəsi Baran Tatlıses hüquqi müstəvidə addım atmağa hazırlaşdığını açıqlayıb.

Xeberal.com xəbər verir ki, bu barədə Türkiyə mediası məlumat yayıb. Bildirilib ki, Tatlıses ailəsində gərginlik son günlər daha da böyüyüb. Tərəflər arasında uzun müddətdir davam edən narazılıq artıq məhkəmə mərhələsinə keçib.

Müğənninin nəvəsi Baran Tatlıses miras üzündən babası tərəfindən təhdid olunduğunu bildirib. “Məsələ getdikcə böyüyür. Babam olan adam məni anam və bacımla təhdid edir. Onunla məhkəmə salonlarında danışacağıq”, - nəvə Tatlıses belə deyib.

Xatırladaq ki, Tatlıses ailəsində daha əvvəl də bir neçə hüquqi qarşıdurma yaşanıb. Müğənninin həm övladları, həm də nəvələri ilə bağlı məhkəmə işləri və qarşılıqlı ittihamlar Türkiyə mediasında geniş müzakirə olunmuşdu.

Bu ölkənin senatında atəş səsləri eşidildi

Filipin Senatının binasında atəş səslərinin eşidilməsi paytaxt Manilada böyük həyəcana səbəb olub.

Xeberal.com xəbər verir ki, insident Senatın növbəti iclası ərəfəsində baş verib. Məlumata görə, binanın daxilindən ard-arda bir neçə atəş səsi gəlib. Bildirilir ki, təhlükəsizlik protokolları dərhal işə salınıb. Senat binasındakı bütün şəxslər təxliyə edilib, giriş-çıxışlar tamamilə bağlanıb. Hadisə nəticəsində xəsarət alanların olub-olmaması ilə bağlı hələlik rəsmi açıqlama verilməyib.

Yerli media atəş açan şəxsin şəxsiyyətinin müəyyənləşdirilməsi və zərərsizləşdirilməsi istiqamətində əməliyyatın davam etdiyini bildirib.