2 saylı Regional Ekologiya İdarəsi niyə tənqid olunur? – Elşən Şirinov və Həbib Əhmədovun rəhbərlik etdiyi qurum ətrafında suallar artır

Ekologiya və Təbii Sərvətlər Nazirliyinin Tovuz, Qazax, Ağstafa, Şəmkir və Gədəbəy rayonlarını əhatə edən 2 saylı Regional Ekologiya və Təbii Sərvətlər İdarəsi son dövrlər müxtəlif iddialar və narazılıqlarla gündəmə gəlməkdədir.

Sosial şəbəkələrdə yayılan paylaşımlar, eləcə də bəzi yerli xəbər saytlarında dərc olunan materiallarda idarənin fəaliyyəti ətrafında ciddi suallar səsləndirilir. İddiaların mərkəzində isə idarədə rəhbər vəzifələrdə adı hallanan Elşən Şirinov və Həbib Əhmədov dayanır.

Yaşıllıqların məhv edilməsi ilə bağlı narazılıqlar

Müxtəlif bölgələrdən yayılan məlumatlarda ağacların kəsilməsi, sərt budanması və yaşıllıqların zəiflədilməsi ilə bağlı narazılıqlar diqqət çəkir. Yerli sakinlər tərəfindən sosial mediada paylaşılan görüntülərdə bəzi ərazilərdə aparılan müdaxilələrin ekoloji baxımdan ciddi suallar yaratdığı iddia olunur.

Bəzi xəbər portalları isə məsələni daha sərt formada təqdim edərək, bölgədə yaşıllıqların qorunmasına lazımi həssaslığın göstərilmədiyini yazır.

Ekoloji nəzarət zəifləyib?

İddialarda o da qeyd olunur ki, bəzi hallarda qanunsuz ağac kəsimi, torpaq və təbiət ərazilərinə müdaxilə halları vaxtında aşkarlanmayıb və ya lazımi səviyyədə tədbir görülməyib.

Bu da bölgələrdə ekoloji nəzarətin hansı səviyyədə təşkil olunması ilə bağlı suallar yaradır.

Sosial mediada narazılıq böyüyür

Son aylarda xüsusilə Şəmkir və ətraf rayonlarla bağlı paylaşımlarda idarənin fəaliyyəti tez-tez müzakirə olunur. İctimaiyyət arasında:

• “problemlərə gec reaksiya verilməsi”
• “nəzarətin formal xarakter daşıması”
• “təbiətə həssas yanaşmanın zəifləməsi”

kimi fikirlər səsləndirilir.

Rəsmi açıqlama gözlənilir

Qeyd olunan məlumatların böyük hissəsi sosial şəbəkə paylaşımları və media iddialarına əsaslanır. Hazırda məsələ ilə bağlı rəsmi qurumların geniş açıqlaması və ya hüquqi qiymətləndirməsi açıqlanmayıb.

Lakin bütün bu iddialar fonunda ictimaiyyətin əsas gözləntisi bölgələrdə ekoloji nəzarətin daha da gücləndirilməsi və yaşıllıqların qorunması istiqamətində ciddi addımların atılmasıdır.

Xeberal.com

"2028-ci ildə Bakıda tramvay yolları istifadəyə verilə bilər" - AYNA rəsmisi

"Nəqliyyat infrastrukturu sahəsində mühüm işlər görülüb. Ümumi uzunluğu 400 kilometr olan yol infrastrukturu qurulub. İctimai nəqliyyatın səmərəliliyini artırmaq üçün avtobus parkı 30 faiz genişləndirilib və bir il ərzində 2300 avtobus istifadəyə verilib.Bu genişlənmə nəticəsində hazırda ictimai nəqliyyat sistemi təxminən 500 milyon sərnişinə xidmət göstərir".

Xeberal.com xəbər verir ki, bunu WUF13 çərçivəsində keçirilən Bakı şəhərinin Baş Planına həsr olunmuş tədbirdə AYNA-nın Bakı Regional İdarəsinin müdiri Tərlan Səfərov deyib.

"Metro və şəhərətrafı dəmir yolu şəbəkəsi də intensiv şəkildə inkişaf etdirilir. Sərnişin dəmir yolu xətləri yaşayış ərazilərinə inteqrasiya olunur, mövcud xətlər modernləşdirilir və yeni marşrutlar planlaşdırılır.

Bununla yanaşı, metro şəbəkəsinin optimallaşdırılması istiqamətində işlər aparılır. Yaşıl və qırmızı xətlərin şəhərin mərkəzində, əsas dəmir yolu vağzalı ilə əlaqələndirilməsi planlaşdırılır. Bu yenilənmə şəhərin ən böyük və strateji əhəmiyyətli nəqliyyat sistemləri arasında əlaqəni gücləndirəcək".

AYNA rəsmisi bildirib ki, tramvay yolları üçün mümkün şərait nəzərdən keçirilir, 2028-ci ilə qədər bunu istifadəsinə çalışırlar:

"Biz artıq 40 milyondan çox aktiv istifadəçiyə çatmışıq. Sistem üzərində 35 mindən çox xidmət və 400 mindən artıq istifadəçi fəaliyyət göstərir. Bu artım bizi daha da ruhlandırır və gələcəyə ümid verir".

Mənzil hüququ digər hüquqların təməlidir - Tamara Paseyro

“İnteqrasiyadan danışarkən torpaq siyasəti, ərazilərin yerləşməsi və düzgün şəhər planlaşdırılması lazımi şəkildə qurulmasa, mənzil problemi yalnız statistik göstəricilərdə həll olunmuş kimi görünür. Reallıqda isə bu yanaşma sosial ayrılıq, təcridolma və insanlar arasında əlaqələrin zəifləməsinə səbəb olur”.

Xeberal.com un məlumatına görə, bu fikirləri Uruqvayın mənzil tikintisi və ərazi planlaşdırılması naziri Tamara Paseyro Marin WUF13 çərçivəsində keçirilən "Mənzil Maliyyələşdirilməsi üçün Yeni Razılaşma" adlı tədbirdə çıxışı zamanı deyib.

Tamara Paseyro Marin qeyd edib ki, mənzil siyasəti digər siyasətlərlə birlikdə sosial birliyi gücləndirərək bərabər imkanlar yaradır. Mənzil hüququ isə digər hüquqları mümkün edən əsas hüquqlardan biridir:

“Uruqvay təcrübəsində məhəllələrin inkişafı proqramları zamanı yerli sakinlərin iştirakı ilə xüsusi komissiyalar formalaşdırılır. Bu qruplarda texniki mütəxəssislər, layihəni həyata keçirən tikinti şirkətlərinin nümayəndələri və icma üzvləri birgə təmsil olunur”.

“WUF13 gələcəyin şəhərləri üçün katalizator rolunu oynayır” - Niderlandlı səfir

"Urbanizasiya, şəhərlər və su bir-biri ilə sıx bağlıdır. Dünyada şəhərlər quraqlıq, çirklənmə və daşqın kimi problemlərlə üzləşir. Bizə sağlamlıq, sanitariya, mənzil və ətraf mühit üçün su lazımdır. Şəhərlər və su ilə bağlı gündəliyin BMT Konfransına çıxarılması çox mühüm məsələlərdən biridir. Buna görə də bütün müzakirələri səbirsizliklə gözləyirəm".

Bu fikirləri Xeberal.com-a açıqlamasında Qlobal Su İqtisadiyyatı Komissiyasının icraçı direktoru Henk Ovink deyib. O bildirib ki, şəhərlərlə bağlı su məsələsi gündəliyin əsas mövzulardan biri olmalıdır:

"Mən bu səhər Bakıya Madriddə keçirilən su sammitindən gəlmişəm. Bakıda şəhər problemlərində su məsələlərini təmsil edirəm. Burada BMT-Habitatın icraçı direktoru da daxil olmaqla yüksək səviyyəli panel müzakirəsinə qatılacağam. Əslən Niderlanddanam və oradau su üzrə səfir olmuşam. Biz Tacikistanla birlikdə 2023-cü ildə keçirilən BMT Su Konfransına rəhbərlik etmişik. Bu forum əsasən mənzil məsələlərinə fokuslanır və dünya hazırda ciddi mənzil böhranı yaşayır. Bu baxımdan forum çox böyük əhəmiyyət daşıyır".

Nümayəndə qeyd edib ki, 2026-cı ildə Bakıda keçirilən bu forum daha uzunmüddətli bir yanaşmanın başlanğıcıdır:

"WUF13-ün şəhərlərin qlobal inkişaf gündəliyində necə rol oynadığı daha aydın görünür. Bu forum həm də gələn il keçiriləcək SDG sammitindən əvvəl baş tutur və post-2030 gündəliyinə hazırlıq baxımından mühüm mərhələdir. Urbanizasiya gündəliyini daha geniş inkişaf kontekstinə necə yerləşdirəcəyimizi müəyyən etmək çox vacibdir.

Hazırda çoxtərəfli əməkdaşlıq çətinliklərlə üzləşir, geosiyasi vəziyyət mürəkkəbdir. Amma belə bir dövrdə insanların və planetimizin gələcəyi naminə ortaq gündəm ətrafında birləşməyimiz çox önəmlidir.

Resursların getdikcə azaldığı bir dövrdə insanların necə yaşaya biləcəyinə dair yollar axtarılır və məncə bu forum məhz doğru zamanda keçirilir. Bu həm mühüm bir an, həm də bizi gələcəyə hazırlaya biləcək gündəmin katalizatorudur", - deyə Henk Ovlink deyib.

WUF13-ün beşinci gününə start verilir

Ümumdünya Şəhərsalma Forumunun (WUF13) Bakıda keçirilən 13-cü sessiyasının beşinci gününə start verilir.

Xeberal.com xəbər verir ki, forum bu gün də işinə müzakirələrlə davam edəcək.

Gün ərzində "Azərbaycanın ilk milli dayanıqlılıq standartının hazırlanması: Dayanıqlı təcrübələr standartı", "Böhranların bərpası və yenidənqurma prosesində mənzilin mərkəzi rolu", "Mənzil maliyyələşdirilməsi üzrə yeni razılaşma", "Şəhərlər üçün iqlimə dayanıqlı təbiətəsaslı həllər (NbS) layihələri üzrə potensialın gücləndirilməsi" və başqa mövzularda müzakirələr aparılacaq.

Xatırladaq ki, işinə mayın 17-də başlayan forumun mayın 18-də rəsmi açılış mərasimi olub və Azərbaycan Prezidenti İlham Əliyev mərasimdə çıxış edib.

Əlavə edək ki, WUF13 BMT-nin Məskunlaşma Proqramı (UN-Habitat) və Azərbaycan hökumətinin birgə təşkilatçılığı ilə keçirilir.

"Hər kəs üçün yaşayış yerləri: Təhlükəsiz və dayanıqlı şəhərlər və yaşayış məskənləri" mövzusuna həsr olunan forum mayın 22-dək davam edəcək.

Lənkəranın inkişafında uzun illərin təcrübəsi – Taleh Qaraşovun doğum günü qeyd olunur

Bu gün Taleh Qaraşov üçün əlamətdar gündür. Uzun illər dövlət idarəçiliyi sahəsində fəaliyyət göstərən, müxtəlif bölgələrdə rəhbər vəzifələrdə çalışaraq topladığı təcrübəni bu gün də xalqa xidmət istiqamətində davam etdirən Taleh Qaraşov doğum gününü qeyd edir.

Azərbaycanda rayon idarəçiliyi sahəsində uzunmüddətli fəaliyyəti ilə seçilən Taleh Qaraşov illər ərzində müxtəlif bölgələrdə çalışaraq dövlət-vətəndaş münasibətlərinin möhkəmləndirilməsi, regionların sosial-iqtisadi inkişafı və insanların rifah halının yüksəldilməsi istiqamətində fəaliyyət göstərən rəhbərlərdən biri kimi tanınıb.

Onun idarəçilik fəaliyyəti xüsusilə bölgələrin inkişafına yönəlmiş layihələr, abadlıq-quruculuq işləri, kənd və qəsəbələrdə infrastrukturun yenilənməsi, sosial layihələrin icrası ilə yadda qalıb. Bu gün rəhbərlik etdiyi Lənkəran son illərdə turizm potensialı, yenilənən şəhər infrastrukturu və sosial layihələri ilə diqqət çəkən bölgələrdən birinə çevrilib.

Müşahidəçilərin fikrincə, Taleh Qaraşovun əsas üstünlüklərindən biri uzun illərin idarəçilik təcrübəsini bölgələrin real problemlərinin həllinə yönəltməsidir. Müxtəlif kənd və yaşayış məntəqələrində keçirilən görüşlər, vətəndaş müraciətlərinə operativ münasibət, şəhid ailələri və qazilərlə davamlı təmas onun fəaliyyətində xüsusi yer tutur.

Regionların sosial inkişafı istiqamətində həyata keçirilən layihələr çərçivəsində yolların yenilənməsi, kommunal problemlərin mərhələli həlli, yaşıllaşdırma tədbirləri və yeni sosial obyektlərin istifadəyə verilməsi də sakinlər tərəfindən müsbət qiymətləndirilən məqamlardandır.

Uzun illərdir dövlət qulluğunda çalışan Taleh Qaraşov həm də təcrübəli idarəçi kimi tanınır. Onun müxtəlif rayonlarda qazandığı idarəçilik təcrübəsi bu gün Lənkəranda həyata keçirilən layihələrdə də özünü göstərməkdədir.

Xeberal.com kollektivi olaraq Taleh Qaraşov doğum günü münasibətilə təbrik edir, ona möhkəm can sağlığı, fəaliyyətində yeni uğurlar və dövlətçilik yolunda davamlı nailiyyətlər arzulayırıq.

Sabiq sədr 200 min manat mənimsəyibmiş

İmişli Rayon Ağsaqqallar Şurasının həbs edilmiş sabiq sədri Saleh Səmədovun cinayət işi üzrə məhkəmə istintaqı başlayıb.

Xeberal.com Qafqazinfo-ya istinadən xəbər verir ki, Bakı Ağır Cinayətlər Məhkəməsində keçirilən iclasda prokuror ittihamı elan edib.

İttihamda yazılıb ki, Saleh Səmədov cinayət baş verən dövrdə tutduğu vəzifədən istifadə edərək ümumilikdə 200 min manat vəsaiti mənimsəyib.

Bu əməlinə görə ona Cinayət Məcəlləsinin 308.1-ci (vəzifə səlahiyyətlərindən sui-istifadə etmə) və 179.3.2-ci maddələri ilə ittiham elan edilib.

"Dünyada bir milyard insan qanunsuz tikililərdə yaşayır" - BMT rəsmisi

“UN-Habitat-ın qiymətləndirmələrinə görə, hazırda dünyada təxminən bir milyard insan qeyri-rəsmi yaşayış məntəqələrində yaşayır”.

Xeberal.com un müxbirinin verdiyi məlumata görə, bunu BMT-nin Məskunlaşma Proqramının (UN-Habitat) icraçı direktoru Anaklaudiya Rossbax Bakıda keçirilən Ümumdünya Şəhərsalma Forumunun (WUF13) dördüncü gününün 13-cü sessiyası çərçivəsində bildirib.

Onun sözlərinə görə, UN-Habitat üçün bu proseslərin daha dərindən öyrənilməsi olduqca vacibdir. Çünki dünyanın müxtəlif regionlarında qeyri-rəsmi yaşayış məntəqələri fərqli formalarda mövcuddur:

“Bu sahədə böyük müxtəliflik mövcuddur və bizim üçün fərqli yanaşmaları anlamaq, hökumətlərin bu problemləri necə həll etdiyini izləmək kritik əhəmiyyət daşıyır. Maliyyələşmə isə, şübhəsiz ki, bu müzakirələrin ən vacib aspektlərindən biridir. Bu sessiya mənim üçün xüsusilə önəmlidir”.

A.Rossbax qeyd edib ki, onun bu sahədəki şəxsi təcrübəsi doğma ölkəsi Braziliyada illərlə apardığı fəaliyyətə, eləcə də "Slum Dwellers International" təşkilatında qlobal səviyyədə gördüyü işlərə əsaslanır. O bildirib ki, fəaliyyəti boyunca həm təşkilatlanmış icmalar, həm də bu sahəyə investisiya yatıran dövlətlərlə əməkdaşlıq edib.

"Qeyri-rəsmi tikililərin leqallaşdırılması risklər yarada bilər" - Mikayıl Cabbarov

Bakıda keçirilən XIII Dünya Şəhərsalma Forumunun (WUF13) növbəti günündə “Qeyri-rəsmi yaşayış məntəqələrinin və gecəqonduların transformasiyası: dünya üçün mənzil təminatı” mövzusunda dialoq sessiyası təşkil olunub.

Xeberal.com xəbər verir ki, sessiyada Azərbaycanın iqtisadiyyat naziri Mikayıl Cabbarov çıxış edərək bildirib ki, qeyri-rəsmi sektorun leqallaşdırılması həmin dövrdə müəyyən sosial problemlərin həllinə kömək edə bilər, lakin bu, uzunmüddətli risklər də yarada bilər:

"Çünki bu proses tikililərin hüquqi müdafiəsinin genişlənməsinə, torpaq istifadəsinə əlavə təzyiqə, kənd təsərrüfatı və meşə sahələrinin azalmasına, su ehtiyatlarına və kritik infrastruktur xərclərinin artmasına səbəb ola bilər.

Bizim tətbiq etdiyimiz yanaşma balanslı yanaşmadır. Bir tərəfdən vətəndaşların hüquqları və sosial ehtiyacları qorunur, digər tərəfdən isə hüquqi intizam, təhlükəsizlik standartları və məsuliyyətli torpaq idarəçiliyi gücləndirilir".

Məsələnin iqtisadi tərəfi ilə bağlı danışan Nazir vurğulayıb ki, problemin həlli üçün maliyyə vəsaiti tələb olunur.

"Çox vaxt siyasətçilər və hökumətlər belə bir dilemma ilə üzləşirlər: bir tərəfdən bu tip yaşayış məntəqələri və qeyri-rəsmi məşğulluq müəyyən iqtisadi fəaliyyət və iş yerləri yaradır, digər tərəfdən isə problemin həlli üçün maliyyə vəsaiti tələb olunur.

Belə olan halda nə etmək lazımdır? Problemi həll etmək naminə iş yerlərini bağlamaq və iqtisadi aktivliyi azaltmaqmı lazımdır?

Azərbaycanın təcrübəsi bu baxımdan konkret nümunədir. 2019–2025-ci illəri əhatə edən yeddiillik təşəbbüs çərçivəsində qeyri-rəsmi məşğulluğun leqallaşdırılması həyata keçirilİb. Bunun əsas məqsədi qeyri-rəsmi sektorun yaratdığı problemlərin həlli üçün əlavə maliyyə mənbəyi formalaşdırmaq idi".

Nazir qeyd edib ki, əvvəllər sosial müdafiə sistemindən kənarda qalan insanlara nağd şəkildə ödənişlər edilirdi və dövlət bundan heç bir rəsmi gəlir əldə etmirdi:

"Nəticə etibarilə isə həmin şəxslər sosial müdafiə sisteminə inteqrasiya olundular. Sosial sığorta haqları və digər daxilolmalar hesabına formalaşan vəsaitlərin bir hissəsi sosial müdafiə əsasında ehtiyacı olan insanların mənzil təminatına yönləndirildi".

WUF13-ün dördüncü gününə start verilir

Ümumdünya Şəhərsalma Forumunun 13-cü Sessiyasının (WUF13) dördüncü gününə start verilir.

Xeberal.com xəbər verir ki, bu gün müxtəlif mövzularda müzakirələr aparılacaq, problemlərlə bağlı həll yolları təklif ediləcək.

Gün ərzində ümumilikdə 150-dək tədbirin keçirilməsi nəzərdə tutulur.

Xatırladaq ki, mayın 18-də WUF13-ün rəsmi açılış mərasimi olub və Azərbaycan Prezidenti İlham Əliyev mərasimdə çıxış edib.

Əlavə edək ki, WUF13 BMT-nin Məskunlaşma Proqramı (UN-Habitat) və Azərbaycan Hökumətinin birgə təşkilatçılığı ilə keçirilir.

"Hər kəs üçün yaşayış yerləri: Təhlükəsiz və dayanıqlı şəhərlər və yaşayış məskənləri" mövzusuna həsr olunan forum mayın 22-dək davam edəcək.