Kliniki Tibbi Mərkəzin həkimi vəfat etdi

Həkim-reanimatoloq-anestezioloq Fətəli Fətəliyev dünyasını dəyişib.

Xeberal.com unikal.az-a istinadən xəbər verir ki, həkim ötən gün 64 yaşında xəstəlik səbəbindən vəfat edib.

Qeyd edək ki, F.Fətəliyev 1991-2008-ci illərdə M.Nağıyev adına Təcili Tibbi Yardım Xəstəxanasında, 2008-ci ildən etibarən isə Kliniki Tibbi Mərkəzdə həkim-reanimatoloq-anestezioloq kimi fəaliyyət göstərib.

Tanınmış kardioloqa vəzifə verildi - FOTO

Məşhur kardioloq Afiyəddin İsgəndərova yeni vəzifəsi məlum olub.

Xeberal.com Qaynarinfo-ya istinadən xəbər verir ki, Afiyəddin İsgəndərov Səhiyyə Nazirliyinin akademik C.Abdullayev adına Elmi-Tədqiqat Kardiologiya İnstitutunun Müalicə işlər üzrə direktor müavini - Baş həkimi təyin edilib.

Bununla bağlı səhiyyə naziri Teymur Musayev bir müddət əvvəl müaviq əmr imzalayıb.

Qeyd edək ki, ötən ilin oktyabr ayında kardioloq Afiyəddin İsgəndərov öz xahişi ilə "Bilgəh" Kardioloji Sanatoriyasının direktoru vəzifəsindən ayrılmışdı. Hazırda "Bilgəh" Kardioloji Sanatoriyasının direktoru vəzifəsini Ləman Məlikova icra edir.

Beş övladın hamısı professor, ataları akademikdir

Nizami Tibb Mərkəzinin direktor müavini, doğum evinin rəhbəri təyin olunan professor Fərəh Qaraqurbanlı tanınmış ailənin nümayəndəsidir.

Xeberal.com yenisabah.az-a istinadən xəbər verir ki, o, akademik Afad Qurbanovun qızıdır.

Əslən Qərbi Azərbaycandan olan A.Qurbanov Azərbaycanın görkəmli dilçi-alimi, türkoloqu və tanınmış ictimai-siyasi xadimi, ölkəmizdə dilçilik üzrə elmi məktəbin yaradıcısı, hazırkı latın qrafikalı Azərbaycan əlifbasının müəllifidir. 1990-cı ildə Əlifba Komissiyasının sədri olmuş filologiya elmləri doktoru, professor, Əməkdar elm xadimi və Dövlət mükafatı laureatı Afad Qurbanov, həmçinin SSRİ Pedaqoji Elmlər Akademiyasının akademiki, Azərbaycan SSR Elmlər Akademiyasının üzvü, Azərbaycan Yazıçılar Birliyinin üzvü və Natiqlik Cəmiyyətinin sədri vəzifələrində çalışıb.

Anası Zöhrəxanım Qurbanova isə tibb elmləri namizədidir.

Fərəh Qaraqurbanlının bir qardaşı - Rəşad Qurbanov hüquq elmləri doktoru, professor, Rusiya Federasiyasının Əməkdar hüquqşünası və Əməkdar elm xadimidir.

F.Qaraqurbanlının digər qardaşı - Ramin Qaraqurbanlı da hüquqşünas-alimdir. O, Avropa Şurasının Ədalət Mühakiməsinin Səmərəliliyi üzrə Avropa Komissiyasının sabiq rəhbəri, Bakı Apelyasiya Məhkəməsinin hakimi, Məhkəmə Hakimləri Assosiasiyaları İttifaqının İdarə Heyətinin üzvü, hüquq elmləri doktoru, Q.V.Plexanov adına Rusiya İqtisad Universitetinin mülki-hüquq fənləri kafedrasının professorudur.

Digər qardaşı Fuad Qurbanov isə tibb elmləri doktorudur.

F.Qaraqurbanlının bacısı Fidan Qurbanova da elm adamıdır. O, filologiya elmləri doktoru, professordur. Fidan Qurbanova Bakı Slavyan Universitetinin Tərcümə fakültəsinin dekanı vəzifəsində işləyib.

Qeyd edək ki, tibb elmləri doktoru, professor Qaraqurbanlı Fərəh Afad qızı Nizami Tibb Mərkəzinə direktor müavini, doğum evinin rəhbəri vəzifəsinə təyin edilib. O, 2008-ci ildən hazırkı təyinatınadək Səhiyyə Nazirliyinin İctimai Səhiyyə və İslahatlar Mərkəzində və “Baku Medical Plaza”da həkim-mama-ginekoloq, həmçinin 2018-ci ildən Azərbaycan Dillər Universitetinin Mülki müdafiə və tibbi biliklərin əsasları kafedrasında müəllim vəzifəsində çalışıb.

Yeni virus daha iki ölkədə aşkarlandı

İspaniyada və Cənubi Atlantik okeanındakı arxipelaqda "MV Hondius" kruiz gəmisindəki epidemiya ilə əlaqəli iki şübhəli hantavirus infeksiyası hadisəsi qeydə alınıb.

Xeberal.com xəbər verir ki, bu barədə "Reuters" məlumat yayıb.

Qeyd olunub ki, yoluxma hallarından biri İspaniyanın Alikante əyalətində 32 yaşlı qadında hantavirusa uyğun simptomlar müşahidə olunur. Ölkənin səhiyyə üzrə dövlət katibi Xavyer Padillanın sözlərinə görə, o, 25 apreldə infeksiyadan vəfat edən "MV Hondius" təyyarəsindəki niderlandlı sərnişinlə eyni təyyarədə olub.

İkinci yoluxma hadisəsi - Britaniyanın xarici əraziləri olan Müqəddəs Yelena, Yüksəliş və Tristan-da-Kunya adalarının bir hissəsi olan arxipelaqda yaşayan britaniya vətəndaşında aşkarlanıb. "O, çox güman ki, aprelin 13-dən 15-dək adalarda dayanacaq zamanı "MV Hondius" gəmisindən düşüb", - deyə məlumatda qeyd olunub.

X​ərçəng müalicəsində böyük uğur

"BioNTech" və "Genentech" tərəfindən hazırlanan fərdiləşdirilmiş mRNT peyvəndi pankreas xərçəngi ilə mübarizədə ümidverici nəticələr göstərib.

Xeberal.com xarici KİV-ə istinadən xəbər verir ki, Amerikan Xərçəng Araşdırmaları Assosiasiyasının 2026-cı il toplantısında təqdim edilən məlumatlara görə, müalicə alan bəzi pasiyentlər son dozadan 6 il sonra belə sağlam qalır. Araşdırmada peyvəndə reaksiya verən 8 nəfərdən 7-nin sağ qalması diqqət çəkir.

“Autogene cevumeran” adlı eksperimental üsul hər xəstənin şişinə uyğun hazırlanaraq immun sistemini xərçəng hüceyrələrinə qarşı aktivləşdirir.

Mütəxəssislər nəticələrin hələ ilkin mərhələyə aid olduğunu bildirir. Tədqiqat az sayda xəstə üzərində aparılıb və hazırda daha geniş - ikinci faza sınaqları davam edir.

TƏBİB-dən son islahatlarla bağlı açıqlama

Həyata keçirilən islahatların dayanıqlı olması üçün insan resurslarının gücləndirilməsi də xüsusi əhəmiyyət daşıyır.

Xeberal.com xəbər verir ki, bu barədə Tibbi Ərazi Bölmələrini İdarəetmə Birliyinin (TƏBİB) İctimaiyyətlə əlaqələr və kommunikasiya departamentinin rəhbəri Elnur Hidayətoğlu jurnalistlərə açıqlamasında bildirib.

Onun sözlərinə görə, bu baxımdan davamlı islahatlar çərçivəsində tibb mərkəzlərinə, xüsusilə rəhbər heyətə təcrübəli, peşəkar və yüksək nüfuza malik kadrların cəlb olunması istiqamətində məqsədyönlü işlər aparılır: “Əlbəttə ki, bütün bu proseslər prioritet istiqamətlər üzrə sistemli şəkildə davam etdirilir. Bu səbəbdən də rəqəmsallaşmanın genişləndirilməsi və vahid elektron sistemin formalaşdırılması, təcili və təxirəsalınmaz tibbi yardım sisteminin təkmilləşdirilməsi, ilkin səhiyyə xidmətinin gücləndirilməsi, eləcə də tibb işçilərinin əmək şəraitinin yaxşılaşdırılması, həkimlərin hüquqlarının qorunması və peşənin nüfuzunun artırılması prioritet istiqamətlər kimi müəyyənləşdirilib. Nəticə etibarilə, həyata keçirilən bütün bu tədbirlərin əsas məqsədi TƏBİB-in fəaliyyətində ana xətt vətəndaş məmnuniyyətinin təmin olunması və səhiyyə sisteminə ictimai etimadın daha da gücləndirilməsidir”.

Son illər səhiyyə sisteminin yeni inkişaf mərhələsinə qədəm qoyduğunu və bunun özünü bir neçə istiqamətdə aydın şəkildə göstərdiyini diqqətə çatdıran E.Hidayətoğlu fikirlərinə belə davam edib: “İlk növbədə, əhalinin sağlamlığının qorunması və keyfiyyətli, əlçatan tibbi xidmətlərin təmin olunması istiqamətində mühüm addımlar atılıb. Bu kontekstdə xüsusilə vurğulamaq lazımdır ki, icbari tibbi sığorta çərçivəsində xidmətlər zərfi genişləndirilib və nəticə etibarilə vətəndaşlara göstərilən xidmətlərin həcmində əhəmiyyətli artım qeydə alınıb. Məhz buna görə də infrastrukturun yenilənməsi və tibb müəssisələrinin müasir tibbi avadanlıqlarla təmin olunması istiqamətində ardıcıl tədbirlər həyata keçirilir. TƏBİB-in tabeliyində olan tibb müəssisələrində hər il milyonlarla vətəndaşa ambulator, stasionar və cərrahi tibbi xidmətlər göstərilir”.

Tibb Mərkəzinə yeni direktor təyin edildi

Xəbər verdiyimiz kimi, Sabunçu Tibb Mərkəzinin direktoru Nurəngiz Bəşirova ötən gün işdən çıxarılıb.

Xeberal.com unikal.az-a istinadən xəbər verir ki, Sabunçu Tibb Mərkəzinin direktoru vəzifəsinin icrası tibb müəssisəsinin direktorunun cərrahi xidmətlər üzrə müavini Kamil Hacıyevə həvalə edilib.

Xatırladaq ki, K.Hacıyev 2025-ci ilin iyul ayında Sabunçu Tibb Mərkəzinin direktor müavini vəzifəsinə təyinat alıb.

Qeyd edək ki, Sabunçu Tibb Mərkəzinin işdən çıxarılan sabiq direktoru Nurəngiz Bəşirova dəfələrlə qalmaqallı hadisələrlə bağlı gündəmə gəlib.

"Yeni Klinika"ya direktor təyin olundu

"Yeni Klinika"nın direktor vəzifəsinə Qalib İmanov təyin olunub.

Xeberal.com teleqraf.az-a istinadən xəbər verir ki, klinikaya rəhbərlik direktor müavini, Ürək-damar mərkəzinin rəhbəri Q.İmanova həvalə edilib.

Qeyd edək ki, "Yeni Klinika"nın direktoru Barat Yusubov dünən vəzifəsindən azad olunub.

Hələlik TƏBİB vəzifəsindən azad olunan xəstəxana rəhbərləri və yeni təyinatlarla bağlı rəsmi açıqlama verməyib, çoxsaylı sorğular cavabsız qalıb.

Qurumdan yaxın vaxtlarda ətraflı məlumat açıqlanacağı bildirilib.

Rezidenturaya ərizə qəbulu başa çatır

Rezidenturaya qəbul olmaq üçün ərizə qəbulu başa çatır.

Xeberal.com xəbər verir ki, bu barədə DİM məlumat yayıb.

Rezidenturaya qəbul imtahanlarında iştirak etmək üçün ərizə qəbulu internet vasitəsi ilə aprelin 13-dən etibarən aparılır.

Bildirilib ki, namizəd rezidenturaya qəbulun I mərhələsinin (baza fənləri üzrə biliklərin qiymətləndirilməsi imtahanının) 1-ci cəhdində iştirak etmək üçün Mərkəzin internet saytının ekabinet.dim.gov.az səhifəsində “Şəxsi kabinet” yaratdıqdan sonra tələb olunan məbləği (60 AZN) “Şəxsi kabinet”indəki hesabına əlavə edir. Hesaba məbləği əlavə etmək üçün ödəniş üsulları ilə epayment.dim.gov.az internet səhifəsində tanış ola bilərsiniz.

Qeyd edilib ki, namizəd “Şəxsi kabinet”inin istifadəçi adı və parolundan istifadə etməklə 20 aprel saat 23:59-dək Mərkəzin internet saytının müvafiq səhifəsinə (https://www.e-gov.az/az/services/read/3148/2) daxil olub “Namizədin elektron ərizəsi” formasını doldurub təsdiq etməlidir.

Baza fənləri üzrə biliklərin qiymətləndirilməsi imtahanının I cəhdinin 2026-cı il mayın 3‑də keçirilməsi planlaşdırılır.

Ötən illərdə rezidenturaya qəbulun I mərhələsində (baza fənləri üzrə biliklərin qiymətləndirilməsi imtahanında) “məqbul” nəticə əldə etmiş namizədlər də rezidenturaya qəbulun II mərhələsində (ixtisas fənləri üzrə biliklərin qiymətləndirilməsi imtahanında) iştirak etmək üçün “Namizədin elektron ərizəsi” formasını doldurur, müvafiq bənddə qeydiyyat aparmaqla ərizəni təsdiq edir (etdirir). İxtisas fənləri üzrə biliklərin qiymətləndirilməsi imtahanına buraxılmış namizədlər tələb olunan məbləği (100 AZN) “Şəxsi kabinet”lərinin hesabına əlavə edib Mərkəz tərəfindən müəyyən edilmiş müddətdə (22-30 iyul 2026-cı il tarixinə planlaşdırılır) qeydiyyatdan keçməlidirlər.

Dəm qazından zəhərlənən uşaqların vəziyyəti açıqlandı

Hacı Zeynalabdin Tağıyev qəsəbəsində dəm qazından zəhərlənən uşaqlardan sonuncusu da ambulator müalicə üçün xəstəxanadan evə buraxılıb.

Xeberal.com xəbər verir ki, bu barədə TƏBİB məlumat yayıb.

Bildirilib ki, azyaşlının vəziyyəti qənaətbəxş qiymətləndirilib.

Qeyd edək ki, aprelin 1-də Sumqayıtın Hacı Zeynalabdin qəsəbəsində çoxuşaqlı ailənin altı üzvü dəm qazından zəhərlənmişdi.