Ədalət Hacıyev: “Teatr canlı orqanizmdir, onu daim inkişafda saxlamaq lazımdır”

Azərbaycan Dövlət Akademik Rus Dram Teatrı ölkənin mədəni həyatında xüsusi rola malik sənət ocaqlarındandır. Teatrın bu günkü fəaliyyəti, qarşıya qoyulan hədəflər və gələcək planlarla bağlı Xeberal.com un suallarını teatrın direktoru, Əməkdar mədəniyyət işçisi Ədalət Hacıyev cavablandırıb.

– Ədalət müəllim, Rus Dram Teatrının bu günkü əsas missiyasını necə xarakterizə edərdiniz?
– Hesab edirəm ki, teatrın əsas missiyası klassik ənənələri qorumaqla yanaşı, müasir tamaşaçı ilə canlı ünsiyyəti təmin etməkdir. Teatr yalnız səhnədə nümayiş olunan tamaşalardan ibarət deyil, o, cəmiyyətin mədəni düşüncəsinə təsir edən mühüm bir platformadır.

– Uzun illərdir bu teatrda çalışırsınız. Rəhbər kimi əsas prinsipləriniz nələrdir?
– Mənim üçün əsas prinsip peşəkarlıq və məsuliyyətdir. Həm yaradıcı heyətə, həm də texniki işçilərə eyni yanaşma olmalıdır. Teatr kollektiv işdir və burada hər kəsin əməyinə dəyər verilməlidir.

– Repertuar siyasətində hansı meyarlara üstünlük verirsiniz?
– Repertuar formalaşdırılarkən balans əsas şərtdir. Klassik dramaturgiya mütləq saxlanılmalıdır, amma eyni zamanda müasir mövzulara da yer verilməlidir. Tamaşaçı zövqü dəyişir və teatr bu dəyişiklikləri nəzərə almalıdır.

– Rus Dram Teatrının beynəlxalq fəaliyyəti barədə nə deyə bilərsiniz?
– Beynəlxalq əməkdaşlıq bizim üçün çox vacibdir. Teatr müxtəlif ölkələrdə festivallarda iştirak edir, qarşılıqlı mədəni mübadilələr həyata keçirilir. Bu, həm kollektivin peşəkarlığının artmasına, həm də Azərbaycan mədəniyyətinin tanıdılmasına xidmət edir.

– Sizcə, teatrın uğurunda idarəetmənin rolu nə qədər önəmlidir?
– Çox önəmlidir. Yaradıcı mühit düzgün idarə olunmasa, nəticə əldə etmək çətin olar. Teatr canlı orqanizmdir, onu daim inkişafda saxlamaq lazımdır. Burada planlama, intizam və yaradıcı azadlıq bir-birini tamamlamalıdır.

– Gələcək planlarınız nədən ibarətdir?
– Gələcəkdə repertuarı daha da zənginləşdirmək, gənc tamaşaçı auditoriyasını teatra cəlb etmək və beynəlxalq layihələrin sayını artırmaq niyyətindəyik. Əsas məqsədimiz Rus Dram Teatrının mədəniyyətimizdəki yerini daha da möhkəmləndirməkdir.